Um Spælival

Hvat er Spælival?

Spælival, sum virki, bleiv stovnað í januar 2022. Tó hevur Spælival verið ein verkætlan, ið var ein partur av Almannaverkinum frá vetur 2019 til vetur 2021.

Hjá Spælival verður dentur lagdur á at stuðla undir sosiala og persónliga førleikamenningina hjá fólki, ið onkursvegna hava trupult við hesum, t.d. neurodivergent fólk (autisma og ADHD), sosialan angist og depressión. Tað er tó ikki neyðugt at hava eina ávísa diagnosu fyri at kunna nýta gott av Spælival.

At hava trupuleikar við tí sosiala kann síggja út uppá nógvar mátar. Tað kann vera t.d. at hava trupult við at vera millum onnur ella at vita, hvat mann skal siga í einari samrøðu. Tað kann eisini vera, at mann hevur trupult við at rúma sínum kenslum og impulsum og reagera ógvulsigt av tí sama.

Hjá Spælival halda vit ikki, at tað er ein rættur og skeivur máti at vera sosialur uppá. Vit ynskja at stuðla undir at menna teir førleikar, ið eru meinginsfullar fyri tann einkulta í teimum umstøðum viðkomandi er í. Vit hava ikki ein facitlista av førleikum, vit ynskja fólk at læra, men vit vilja gjarna gera tað, vit kunnu, til at tann einkulti hevur tað gott við sær sjálvum og øðrum.

Eitt hjartamál hjá Spælival er at gera upp við teir fordómar, ið eru um neurodivergent fólk og stuðla undir felags forstáilsi fyri hvørjum øðrum. Vit halda fast í, at tað er óneyðugt og til tíðir skaðiligt at royna at noyða ein neurodivergentan persón at uppføra seg á ein neurotypiskan hátt. Tí vilja vit vera við til at breiðka vitan og skapa eitt stað, har tað er heilt ok at vera akkurát, sum mann er.

Dungeons & Dragons er eitt borðrolluspæl. Tað vil siga, at har eru ymiskar reglur fyri, hvussu man spælir, men eisini ein fríður og kreativur partur, har mann skal spæla eina rollu. Fokusið í Dungeons & Dragons er at fortelja eina søgu saman. Og sjálvandi eisini at berjast móti óndum skrímslum og drekum.

Tá mann er spælari í Dungeons & Dragons, skal mann gera sær ein figur. Mann velur sær eina rasu (álvur, dvørgur, orkur osf.) og eina yrkisleið(class). Út frá hesum hevur figururin ávísar eginleikar, sum gera hann/hana heilt serlig/a. Síðani finnur spælarin uppá eina søgu um figurin, t.d. hví eru tey farin út á ævintýr? Hvat hava tey uppliva í lívinum? Hvat er teirra størsta ynski?

Tá mann spælir Dungeons & Dragons, skal ein vera Dungeon Master ella Spælmeistari. Hjá Spælival er tað eitt starvsfólk. Spælmeistarin er søguforteljarin fyri ævintýri og tann, sum dugir reglurnar og stýrir øllum øðrum, mann kann møta í søguni.

Tað er ikki neyðugt at duga at spæla Dungeons & Dragons, áðrenn mann byrjar hjá Spælival. Spælmeistarin tekur sær av at læra nýggjum spælarum reglurnar og at læna útgerð, um mann ikki hevur tað sjálvur.

Um man er 10 ár ella eldri og hevur hug at royna at vera í einum bólki, er man vælkomin. Taðz vit raðfesta hægst, er, at tey, ið luttaka hava tað stuttligt og kenna seg tryggan.

Dentur er lagdur á at stuðla undir sosiala og persónliga førleikamenning, men tað er ikki soleiðis, at vit halda, at tað er ein rættu ella skeivur máti at vera sosialur á.

Um man er millum 10 og 17 ár kann man fáa ávísing til ergoterapi frá kommunulæknanum. Eisini ber til at melda seg til umvegis Almannaverkið.

Aftaná man hevur fingið ávísingina, skrivar man ein mail á info@spalival.fo ella ringur á 220831 og meldar seg til.

Er man 18 ár ella eldri, meldar man seg til umvegis Almannaverkið.

Set teg í samband við tín málsviðgera ella starvsfólk har tú býr. Tey seta seg síðani í samband við Spælival og tú verður meldaður til.

Er ivi í nøkrum so ring ella skriva endiliga til okkum. Vit svara gjarna øllum spurningum.